ცნობაროგორც ცნობილი გახდა, ჭყონდიდის ეპარქიის ყოფილი ხელმძღვანელი პეტრე ცაავა, – რომელსაც 2019 წელს სინოდმა მღვდელმოქმედება აუკრძალა პატრიარქ ილია მეორის მიმართ სკანდალური ბრალდების შემდეგ, სინოდის სხდომაზე დასწრებასა და ახალი კათოლიკოს-პატრიარქის არჩევნებში მონაწილეობას ითხოვს.
ეს მიმართვა საპატრიარქო ტახტის მოსაყდრე შიო მუჯირისა და წმინდა სინოდისადმი პარასკევს, 3 აპრილს, გამოაქვეყნა “ფეისბუქზე” იღუმენია თამარ გამყრელიძემ, – ცაავასთან დაკავშირებულმა სასულიერო პირმა.
მიმართვა დათარიღებულია 2026 წლის 23 მარტით – ეს არის კათოლიკოს-პატრიარქ ილია მეორის დაკრძალვის მომდევნო დღე.
მიმართვის დასაწყისში პეტრე ცაავა საკუთარ თავს მოიხსენიებს “კანონიკურ სტატუსში მყოფ მღვდელმთავარს“ და ამბობს, რომ თავს მოვალედ თვლის, მონაწილეობა მიიღოს საპატრიარქო კანდიდატის გამოსავლენად გამართულ არჩევნებში.
ამ თემაზე დასმულ შეკითხვას “პალიტრანიუსის” გადაცემა “360”-ში ჭყონდიდის, ცაგერისა და ლენტეხის ეპარქიის მიტროპოლიტმა მეუფე სტეფანემ ასე უპასუხა:
‘სინოდის სხდომაზე ეს საკითხი არ განხილულა. არ მახსოვს რომელ სინოდის სხდომაზე მოხდა, მაგრამ მას მერე ის სინოდის წევრი აღარ არის. სინოდს არ ჰქონდა ეგ საკითხი განსახილველად, არც განიხილა. ვინ გასცემს მას პასუხს მეუფე შიოს გადასაწყვეტია. ჩემს პირად დამოკიდებულებას ვიტყვი. როდესაც პატრიარქს აბრალებდნენ სოდომურ ცოდვას ეგ და ძმანი მისნი, ამბობდნენ, – დრო გამოაჩენსო, გამოაჩინა დრომ? – პატრიარქი განადიდა ღმერთმა. ამდენი ხალხმრავლობით, ცრემლით, შინაგანი სიმშვიდით, რომლითაც გაერთიანდა ხალხი…
ეს დიდებაა ადამიანისა, მილიონობით ხალხი… ზოგი ჯვარს ადებდა, ზოგი ფსკვნილს… ვისაც არ ჰქონდა ამის შესაძლებლობა, ჩემს თვალწინ, უამრავჯერ იყო, ვინც ახლოს იყო, მიაწვდიდნენ ნივთს, დაადებდნენ და შემდეგ უბრუნებდნენ.
მე დიდი იმედი მქონდა, რომ ამ ყველაფერს მეუფე პეტრე დაინახავდა. რომ უფალმა უწმინდესის მიმართ მისი პოზიცია არ გაითვალისწინა. გლეხურად ვლაპარაკობ… ცოტა სირცხვილი მაინც ჰქონდეს, უფლის წინაშე მაინც შენდობა ითხოვოს, თუ პატრიარქის წინაშე არ ითხოვს. რომ ასეთ სიბინძურეს აბრალებდა მას და უფალმა გამოაჩინა თუ ვინ არის ჩვენი პატრიარქი. ვინმეს ეჭვი ეპარება ჩვენი პატრიარქის სიდიადეში? – პეტრეს თუ ეპარება ეჭვი, თავის ეჭვთან ერთად იყოს სადაც უნდა, აქ სინოდში ნუ ეტენება, იმიტომ რომ ეს მისი საქმე აღარ არის. გადიდდა უწმინდესი ყველას წინაშე, ყველამ დაინახა და განულდა პეტრე, არაფერი არ არის, ცარიელია. იმიტომ რომ სრულიად საწინააღმდეგო მიმართულებით წავიდა. სული წმინდის მადლმა გამოამჟღავნა სულ სხვა რამე და ის სულ სხვა რამეს ცდილობს”.
წყარო : Ambebi.ge
The post პეტრე ცაავა პატრიარქის არჩევნებში მონაწილეობას ითხოვს – რას პასუხობს მას მეუფე სტეფანე appeared first on elNews.ge.