„გურია ნიუსის“ მიერ მოპოვებული ინფორმაციით, წელს, აღდგომას, ლანჩხუთის მუნიციპალიტეტის სოფელ შუხუთში ლელობურთი არ გაიმართება.
როგორც ჩვენთვის გახდა ცნობილი, მიზეზი საქართველოს კათალიკოს-პატრიარქის, ილია მეორეს გარდაცვალებაა. ლანჩხუთის მუნიციპალიტეტის მერიის პრესსამსახურის ხელმძღვანელის, მაკა სულაბერიძის თქმით, ამ ეტაპზე ცნობილი არის, რომ ბურთი წელს შეიკერება.
„ამ ეტაპზე მხოლოდ ამ ინფორმაციის მოწოდება შემიძლია. მოგვიანებით დაზუსტდება და აუცილებლად იქნება ცნობილი მედიისთვის და საზოგადოებისთვის“, _ გვითხრა მაკა სულაბერიძემ.
ინფორმაციისთვის, ლელოს შუხუთში წელიწადში ერთხელ, ყოველთვის აღდგომა დღეს თამაშობენ. ეს ტრადიცია გასული საუკუნის 40-იან წლებში, კომუნისტებმა დაარღვიეს და ლელობურთი 1 მაისს, მშრომელთა საერთაშორისო დღეს გადმოიტანეს.
შუხუთის ლელოს წესებით, ბურთი 16-დან 18-კილოგრამამდე შეიძლება იწონიდეს, ის საქონლის ტყავისგან იკერება, შემდეგ გრიგოლეთის სილითა და ნახერხით ივსება. უწინ მოკერვამდე, ბურთში მეღვინეობის ქართული წარმართული ღვთაების _ აგუნას წვენს ასხამდნენ. მოგვიანებით, ის ღვინო ალადასტურმა ჩაანაცვლა.
ადრე, სოფლის ცენტრში თოფის გასროლისა და ლელოს აგდების პატივი უხუცეს მოთამაშეებს ჰქონდათ.
ბოლო წლებში, ამ რიტუალს სოფლის მღვდელი ატარებს.
ბურთი შუხუთის ეკლესიის ეზოში ივსება და თამაშის წინა ღამეს ტაძარში საგულდაგულოდ ინახება.
The post შუხუთში ტრადიციული ლელობურთი, სავარაუდოდ, წელს არ გაიმართება appeared first on გურია ნიუსი.