სააგენტო "პარალელი"
“როგორც საბჭოთა წესი და რიგი იყო საბჭოთა ხელისუფლება შეეცადა კატასტროფა დაემალა” – ლაშა ბაქრაძე ჩერნობილის კატასტროფაზე
ქართველი ლიტერატურათმცოდნე, ისტორიკოსი, გერმანისტი ლაშა ბაქრაძე 40 წლის წინ ჩერნობილში მომხდარ კატასტროფას, ტრაგედიას ეხმაურება და კონკრეტულ ფაქტებზე აკეთებს აქცენტს:
“40 წლის წინ ჩერნობილში ატომური ელექტროსადგურის მეოთხე ბლოკი აფეთქდა. როგორც საბჭოთა წესი და რიგი იყო საბჭოთა ხელისუფლება შეეცადა კატასტროფა დაემალა.
28 აპრილს, დილით, შვედეთში გამოსხივება გაზომეს და თითქმის 40%-ით აღემატებოდა ნორმალურს. საბჭოეთმა უარყო, რომ ამ ამბავთან რაიმე საერთო ჰქონდა.
ახალი ჩასული ვიყავი იენაში, გდრ-ში. დასავლეთ გერმანიის ტელევიზიის ვუყურებდით ყველა და როცა გამოაცხადეს, რომ საბჭოთა კავშირში დიდი ატომური კატასტროფა მოხდა, ჩემებს დავურეკე. მამაჩემს, რომელსაც კომუნისტების ერთი სიტყვისაც კი არ სჯეროდა – ამხელა კატასტროფას თუ დამალავდნენ მაინც ვერ წარმოედგინა. ცოტა არ იყოს გამიკვირდა.
ორიოდე თვით ადრე, 1986 წლის თებერვალში კომპარტიის XXVII ყრილობაზე გორბაჩოვი ბევრს ლაპარაკობდა Гласность-ზე (საჯაროობაზე).
28-ში საღამოს „ავარიის“ აღიარება მოუწიათ კომუნისტებს. 29-ში სიტყვა კატასტროფაც იხმარეს, მაგრამ კატასტროფის მასშტაბებს ისევ მალავდნენ – აბა, პირველმაისობას ხომ არ ჩაუმწარებდნენ ხალხს.
პირველ მაისს, კიევში, ხალხი რასაკვირველია არ გააფრთხილეს და დიდი ზარ-ზეიმით ჩაატარეს პირველმაისობა. არადა, ჩერნობილის რადიოაქტიური გამოსხივება ორასჯერ აღემატებოდა ჰიროშიმაზე ჩამოგდებული ბომბისას.
ფოტოზე: 30 აპრილს საბჭოთა ტელევიზიით ნაჩვენები ჩერნობილის აეს-ის პირველი ფოტო, რომელიც რეტუშირებული (დაფოტოშოპებული, ახალგაზრდებისთვის უფრო გასაგები რომ იყოს) იყო, კატასტროფის მასშტაბის დასამალად“, – წერს ლაშა ბაქრაძე სოციალურ ქსელში.
“როგორც საბჭოთა წესი და რიგი იყო საბჭოთა ხელისუფლება შეეცადა კატასტროფა დაემალა” – ლაშა ბაქრაძე ჩერნობილის კატასტროფაზე
პარალელი